【Now財經台】港鐵公司(00066)今朝輕微低開後，跌幅擴大，一度跌近5%，低見35.3元，跌至近2年低位，成交股數較過去100日同時段平均增2倍，暫時成交金額逾1.7億元。
港鐵跌勢轉急相信同美國息口高企有關，美匯指數持續強勢，喺今日亞洲交易時段一度高見114.7以上，美國10年期國債孳息率更一度升穿4厘，衝上逾12年高位。據《彭博》資料顯示，港鐵參考股息率約4.06厘，相比之下，風險較低嘅美債明顯吸引力較大，都對港鐵等收息股造成沽壓。
港鐵已連開6支陰燭，股價連跌第6日，累跌12%，不過，今年只係累跌15%，大幅「跑贏」恒指嘅25%跌幅，雖然14天RSI落到15嘅嚴重超賣水平，但過往曾經試過跌至9先有反彈，喺利好因素欠奉下，港鐵隨時繼續尋低。
