【Now財經台】自聯儲局上周議息後，市場預期加息之路有排都未見盡頭，息口敏感股開始捱沽，其中房託基金(REITs)跌勢轉急，今日更幾乎所有REITs都破底，見最少52周低位。依家美國10年期債息仍未升穿4厘，市場估計，美息會加到4.4至4.6厘，依加有5厘息嘅領展房產基金(00823)係咪都會繼續成為沽貨對象？
獨立股評人莫灝楠指，領展經營屋邨商場生意，資產同經濟周期嘅相關性較低，所以股價比較硬淨，反而其他二、三線REITs，經營酒店資產或寫字樓居多，好多都係借錢做投資之餘，亦容易受經濟周期影響，資金成本有上升空間，令投資價值降低，加上買得REITs嘅投資者，係希望有固定收入，但喺市況差之下，買REITs都有風險，股息回報又低過美國國債，市場自然沽高息股，轉買美國國債，事實上，REITs嘅盈利增長好慢，投資者自然對呢類股份冇乜興趣。
