【now.com財經】噚日尾市揀咗隻恒指熊(50779)出嚟，以平均買入價0.058元嚟計，今朝指數一度低見17,648點，將第一層牛證全數殺晒，再將17,650至17,699點半層街貨都隊死埋，呢度夾埋有相當於1,354張期指，而第二層嘅頭段，即17,600至17,649點先至係重貨中嘅重貨區。
唔貪心嘅作戰室戰友s同我都喺今朝見指數穿過17,700點後，將所有淡倉收起，即使用Swing Trade玩法亦屬合理，(50779)係以五分鐘圖上Slow STC(14,3)上到超買而落場，咁喺今朝10點40分至11點55分，Slow STC(14,3)都處於超賣至嚴超賣範圍，喺呢度時間走(50779)亦可，以期內高低位做過0.082元/0.073元計，平均賣出價為0.0775元，一計之下，呢一注平均賺幅有33.62%。
「點解唔揸到落去食晒嗰三層牛證先至走隻熊呀？咁就唔止33%啦？」係嘅，如果預期指數直落再去，的確唔止33%，但問題係，當你手上隻熊唔換貨嘅話，指數再向下行，現價同收回價嘅遠，就會壓低熊證嘅槓桿，即係話你愈揸隻熊，你隻熊嘅槓桿只會愈嚟愈少。可以用一個好衰但容易理解嘅概念去諗就係，一個人堅持同「另一個人」長廂斯守的話，「另一個人」只會愈嚟愈老；但一個人如果係經常換畫，20歲識個20歲、30歲仍然識個20歲、40歲都仲識緊啲20歲，去到50歲隔離嗰個都仲係20歲，「另一個人」仍然保持「最佳黃金時間」，咁你話邊一個「補」啲？(只係一個大家會比較容易明白嘅例子咋)
其次係，要捉指數某一目標Which is 真係有啲距離，同時又預咗真係需要啲時間的話，先行收割可以喺呢段路程中做咗割禾青嘅部份，之後搵個新嘅、靚啲嘅位入又得，發現唔對路即時終止策略又得，將已鎖定嘅利潤再投放於下一輪新嘅接力賽中，到時再選擇加或減成本又得。
既然可以咁靈活嘅時侯，咁做乜要一成不變？你問下唔結婚嗰班人就會更加明白架啦！
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
