【Now財經台】藥明生物(02269)開市前出通告，話計劃斥資最多3億美元回購股份，折合逾23億港元，如果以今日暫時即市高位約49元計，即涉及逾4700萬股，佔已發行股本比例好小，今次回購似乎唔夠誠意。
元宇證券投資總監林嘉麒話，如果用回購金額計，規模當然唔係好大，但就釋出兩個訊號，首先係公司考慮回購，即價值可能浮現，亦係股價回穩嘅訊號，其次係公司一旦出手回購，「空軍」就會即刻收歛，雖然回購金額唔大，但短線「空軍」會減少或停倉，對藥明股價都會有啲幫助。
KK又話，依家藥明嘅市盈率(PE)及帳面值都算貴，因此，估計公司未必會咁快出手，依家可以視為先「出口術」，而「空軍」之後係咪會收手先係重點，估計藥明會睇住市場反應，再決定幾時出手，如果股價守唔住40元關口，基本面就出現好大問題。
