【now.com財經】今朝喺呢度無揀過任何貨，事關都只係掛住快快脆執完一手好食之後，補補隻M通Put(10573)條氣(都話Set止蝕好重要架啦)，做好啲工作之後食飽啲，準備今日收工之後去抽血(係呀！我嘅甲亢之旅仲未結束，仲有成半年呀！)
指數今朝由低位開始上行至最高一度升過百點之後，指數再向下回落，及至中午升幅收窄至升30點，報17,964點。五分鐘圖上見指數同Slow STC(14,3)都處於中軸水平。
下半場開市後即見指數於五分鐘圖上未能上破中軸，「大陰燭」向下運行之後，指數再次回落到保歷加通道底線，但由於「大陰燭」嘅出現，將整條保歷加通道拉低向下，指數可能喺向下嘅保歷加通道中玩Swing都唔出奇。
如果大方向去捉，即唔用五分鐘圖咁快嘅時間去捉指數的話，睇返今日日線圖，由今朝見陰燭，再變陽燭，再變成為依低開高走(空心)嘅陰燭，某程度上都反映咗指數喺朝落到17,740點之後有一堆好友支持返指數上行，雖然依家粒燭仲未行完，但如果上影線再長啲(即燭身再壓扁啲)，咁低位「倒轉錘頭」即刻成形，呢個絕對係一個利好嘅訊號，同時留意返目前熊證第一層街貨為18,500至18,599點，即使計埋今日新上市嘅貼價熊，最貼價收回價落到去18,400至18,499點，以目前1點17分恒指做緊17,896點計，指數同明日見到嘅第一層熊證仍然相差504點，而牛證最貼價層退到17,700至17,799點，以同一現價計，即相差196點。邊個近啲？你話啦。
再者，今日指數走勢都比較上上落落，升過跌過，隨時聽日返嚟牛熊兩邊都會坐返唔少過夜貨，但大前題係本身牛證肥大肉厚，又指數累跌咁多，今日再借埋大笨象(00005)向下挫落去土把，將指數再推低啲，估計入近牛博指數見回升都為數唔少，唔求彈高上擒殺熊，但求「下降通道」中見一兩粒陽燭已經足夠。
坦白講仍然睇淡恒指之後走勢(經濟係差，但都係得港股一個創逾10年低位...叫本地老散情何以堪)，勢弱難救唯有順勢而行，只係當Alert喺「下降通道」中出現嘅陽燭。
恒指熊(50779)，收回價18,445點，同現價有逾560點差距，市場上最貼價熊證之中槓桿最高，今日新上市所以未知街貨，依家1點36分，作戰室反手淡倉已經開動咗，不過都係即日鮮；如果以日線圖+街貨圖嚟做Trade的話，不如吼返五分鐘圖上見Slow STC(14,3)上返超買先至出動啦，時間上如果接近收市嘅話，一係擇日重賽，一日注碼上控制一下，出過夜注。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
