【Now財經台】快手(01024)股價今年累跌約23%，稍微跑贏科指逾35%跌幅，集團今日宣布將推出網購業務，並指會喺「雙十一」購物節期間力推短視頻、直播間、店舖、商城等唔同商家經營渠道。
摩根士丹利出報告力撐快手，指公司上月試營呢項業務時，約70%付費用戶係新客，又提及抖音網上商店及搜尋佔總商品價值(GMV)近20%，估計新業務可提升公司廣告收入。
艾德證券期貨聯席董事陳政深認為，剛開展業務時或要畀較大折扣吸客，即使GMV唔錯，但扣除成本後收入唔會太多，未必即時幫到快手下半年扭虧為盈。佢又認為，快手的確有必要拓展新業務增加收入，依家公司主要收入來自直播業務同線上營銷(包括直播帶貨)業務，雖然帶貨業務營業額較高，但增長慢過直播業務，而看似發展潛力較大嘅直播業務，因內地相關監管愈來愈嚴，或影響未來營收。
此外，呢排屢傳快手主要股東之一騰訊控股(00700)可能會減持，Ryan就話，暫時未見到股權出現異動，但近期摩根大通、高盛及深港通都錄得大手減倉，其中摩通嘅持倉有部分或屬於快手上市前股東，佢估計，快手股價反彈後或要再經歷一浸沽壓，投資者可以睇實54.8元，如果跌穿咗呢個支持位，快手股價就冇咁快翻到身。
