【Now財經台】煤股今日跌幅顯著,行業噚日起傳出多個利淡消息,包括發改委再出手遏煤價升勢,禁止煤企以「陰陽合同」等方式額外加價,又督促企業嚴格執行已簽訂合同價格。
中國神華(01088)月初正式「染藍」,市場經常話有一個「染藍魔咒」,即成為藍籌後就冇運行,睇返今年「染藍」嘅股份,其中東方海外國際(00316)及中升控股(00881)「染藍」後分別累跌22%及41%。
在能源危機及煤價向上等因素下,神華股價今年已累升34%,而恒指就累跌近20%,神華明顯大幅跑贏,股價今日1支大陰燭跌穿20天線,若短期未能收復,可能要跌到23.4元先有支持,即係恒指公司宣布將神華納入成分股時嘅水平。