【Now財經台】截至早上11時止 ，1小時內《彭博》用戶關注度上升最多港股，依次為藥明生物(02269)、太古地產(01972)、信達生物(01801)、中國人壽(02628)及中國恒大(03333)。
今日有兩隻生物科技股上榜，有消息指美國總統拜登計劃簽署針對生物科技產業嘅行政命令，加強扶持當地企業，減少對中國依賴。藥明生物股價好大反應，今朝低開逾7%，跌幅一度擴大至逾20%，因集團海外業務佔比較大，打擊亦相對大。不過，摩根士丹利力撐藥明，估計實際影響最少5年後先會反映，加上投資規模未定，估計影響有限。
資深證券分析師彭偉新指，喺不明朗情況下，大部分投資者都會有動作，以減磅為主，雖然藥明急挫，但流出嘅資金規模唔大。佢又話，藥明以大陰燭下跌，如果收市仍貼近低位，或反映短期內仍有沽壓，有機進一步下試低位，佢認為投資者喺現水平都冇信心或理據博反彈。
