【Now財經台】復星國際(00656)周二再有減持動作，過去5個月合共減持套現17.9億美元，股價今日曾跌至8年低位4.87元。復星股價今朝平開後，好快就開始下滑，午後跌勢劇，最終以接近全日低位4.88元收市，跌4.5%。
截至今年中，復星國際未償還總債項達2600億元人民幣。《彭博》資料顯示，出年集團有相當於17億美元在岸及離岸債到期。公司早前減持完復星醫藥(02196)嘅A股、招金礦業(01818)後，周二又折讓減持復星旅遊文化(01992)，仲部署減持喺上海上市嘅海南礦業，同埋幾個月前減持嘅財產及意外傷害保險公司Ameri Trust及青島啤酒(00168)股權。
摩根士丹利話，復星連番減持，或令市場憂慮集團因內房債問題，而有短線流動性壓力。不過，大摩提及，集團有大量股票組合可套現，相信佢有能力處理短期債務，但長遠仍要積極減債先可挽回市場信心。
復星喺港股仲持有寶寶樹集團(01761)及重慶農村商業銀行(03618)，可以留意集團跟住仲有冇減持動作。
值得留意係，大摩給予「增持」評級及11.4元目標價，高過現價1倍有多。
