【Now財經台】雖然電能實業(00006)股價今日跌得唔多，但暫時已連第13日，累跌約9%，係最少25年以來最長跌浪，不過，電能股價今只係跌7%，相比恒指今年暫時累跌18%，電能仍跑贏大市。
目前，對電能溢利貢獻最大係英國業務，面對歐洲能源危機升級，英國有可能錄得高達18%嘅超高通脹，經濟步入衰退、英鎊弱勢，加上政治不確定性，稍後有新首相上任，都對電能業績帶來負面影響。
股價方面，電能14天RSI最新落到去13水平，係2020年3月以來，再度跌穿20呢個極超賣水平，短線或會出現技術反彈，但唔代表股價會轉勢，睇返過去兩年股價走勢，當股息率去到8厘，股價先會轉勢反彈，意味股價有機會未見底，短線要留意守唔守得住45元呢個支持位。
