【Now財經台】內房旭輝控股(00884)今朝開市前突然停牌，公司中午宣布以先舊後新方式，折讓配股集資，股價午後復牌急挫。其實旭輝應該唔會太水緊，噚日公布業績時指，公司手頭現金312億人仔，舊年供股又籌咗近17億元。點解仲要「抽水」？
英皇證券研究部總監陳錦興指，內房股資金需求大，雖然旭輝配股集資金額唔大，但喺資金流極唔明朗下，做法都係合理。旭輝股價復牌大跌，主要係市場睇得較淡，加上最新出爐嘅業績唔係特別靚仔，而啱啱出完業績就嗌「抽水」都有啲趕客。
Stanley又話，始終整個內房行業都面對資金流問題，銷售至今仍然好疲弱，旭輝亦唔例外，一定對資金流回籠有影響，如果市場上仍有投資者願意接貨，相信公司都會願意集資，未雨綢繆。
