【Now財經台】截至早上11時止,1小時內《彭博》用戶關注度上升最多嘅港股,依次為新奧能源(02688)、瑞聲科技(02018)、長城汽車(02333)、安踏體育(02020)、海底撈(06862)。
新奧上周五收市後出咗業績,股價今朝捱沽,半日收市大跌近11%,報107.6元。受天然氣價成本上升影響,集團中期少賺近18%,但收入大升逾41%。
華盛証券經紀部董事李偉傑認為,俄烏戰爭後歐洲天然氣價飆升,新奧等內地燃氣分銷商嘅毛利率難免受壓,市場一直關注燃氣分銷商可唔可以將成本轉嫁畀消費者,而新奧上半年業績反映公司盈利增長無以為繼,導致股價今朝急瀉。
不過,大行畀新奧嘅目標價大部分仍喺100元樓上,其中摩根大通仲睇好新奧可以升到145元。Jason表示,油價6月開始逐步回落,大行或預期燃氣價格會隨著俄烏局勢明朗化,有望喺下半年回落,所以未有因應業績下調目標價。