【Now財經台】騰訊控股(00700)股價喺業績後造好，加上集團預告有回購動作及派息，都支持股價持續向上，不過，科技股始終仲有好多不確定性，騰訊股價呢兩日上返20天線，多唔多好友先行獲利？還是繼續追貨？
星展財資市場部上市產品主管周國威指，騰訊資金的確有食糊嘅情況，同埋轉為造淡，始終一直受南非股東減持消息困擾，所以見到股價反彈，好倉就以沽貨為主，因騰訊股價喺業績前於295元至305元造咗一個較長期嘅平台，唔少資金喺業績前買咗好倉博高開，由於成功博到，所以噚日流出嘅牛證及CALL輪資金合共約5000萬元，而反手造淡買熊證及PUT輪就有2000萬元，但騰訊股價今日繼續升，始終騰訊好多壞消息已經喺市場發酵咗成個月，出完業績後發現經營環境冇進一步惡化，唔少投資者都做返好倉部署，條款上不妨留意長年期騰訊及CALL輪。
