【Now財經台】截至早上11時止，1小時內《彭博》用戶關注度上升最多港股，依次為港交所(00388)、聯想集團(00992)、騰訊控股(00700)、海通國際(00665)、新秀麗(01910)。
新秀麗股價今朝一度升15%，高見20.6元，集團中期轉賺5630萬美元，期內銷售額增長近60%，毛利率亦大升至近56%，集團又上調今年銷售指引，最新估計今年銷售僅較2019年，即疫情前跌10%至15%。業績後獲大和、麥格理、富瑞、摩根士丹利4家大行上調目標價，新秀麗表現係咪有望重返疫情前水平？
椽盛資本投資總監曾永堅指，新秀麗中期業績的確畀到市場及投資者驚喜，雖然中期業績唔錯，但其實唔係冇隱憂，市場依家擔心歐美經濟陷入衰退，尤其係歐洲經濟，宏觀環境唔明朗，會影響新秀麗今年第4季至明年第2季表現。
佢又話，整體嚟講，新秀麗現價已充分反映咗業績、盈利嘅利好因素，因此，股價喺25元水平會有一定阻力。
