【Now財經台】港股近排持續悶局，喺20000點上落，成交又少，截至噚日止，已連續11個交易日成交唔夠1000億元。雖然大市冇乜起色，但滙豐控股(00005)表現反而唔差，今個月一直喺52元至53元上落，滙控後市會點走？
DataLouder創辦人陳栢運指，其實滙控走勢唔算特別好，但抗跌力就唔錯，股價啱啱突破一個大型收窄三角型態，當突破收窄三角型態時，好大機會會行一段向上或向下嘅大波段，呢個時候就適合用期權獲利。
佢又話，依家可以考慮用Long Strangle策略部署，即買入價外嘅認購及認沽期權，而期權數量及到期日必須相同，唔需要估方向，只要股份向上或向下有大波幅，就可以獲利，例如依家走勢向下，即使Long Call輸咗60%，Long Put所得到嘅利潤都可以補償返，甚至獲利。
