【Now財經台】連日強勢嘅美股終於要唞一唞,道指5連升斷纜,跌逾170點,標指及納指就錄得約3周最大單日跌幅,聯儲局噚晚公布上月議息會議紀錄後,道指曾短暫倒升,雖然會議紀錄嘅言論同主席鮑威爾上月議息後嘅論調一樣偏鴿,但美股仍要跌,不過,9月加息0.75厘嘅預期,最新由50%降至36%。
鴻鵠資產管理行政總裁兼首席投資總監陸庭龍指,唔需要太在意加息幅度,因為操作一定有空間,一次加多啲或加少啲其實影響唔大,只要符合控制通脹嘅進度就可以。
佢又話,其實聯儲局暫時仲未遏到通脹,而會議紀錄都再次提及唔會停止加息,但幅度可以調整。此外,會議紀錄亦提及局方會就衰退作準備,但依家仲未睇到衰退會有幾深,同埋會持續幾耐,所以市場唔應該預期聯儲局短期內會放慢加息步伐。