【Now財經台】華潤啤酒(00291)中午公布業績後,股價短暫升幅擴大,曾升近6%見超過一個月高位,但升幅好快收窄,今次業績其實唔算好標青,收入得單位數增長,純利倒退11%,但股價反應又唔錯,今次應如何解讀業績?
英皇證券研究部總監陳錦興指,業績表現好似麻麻,但深入啲睇,去年同期公司其實出售咗一幅土地,扣除有關項目,中期核心盈利有逾20%嘅增長,而且潤啤主要做內銷,內地市場喺第二季其實特別受壓,喺咁嘅情況下核心盈利有逾20%嘅增長其實算唔錯,加上產品高端化令公司嘅毛利率可以維持,相信市場都係用呢個角度去解讀,所以認為業績交到功課。