【Now財經台】內地以及美國連串經濟數據失色，加埋伊朗核問題談判有望出現突破，紐約期油及倫敦布蘭特期油齊齊受壓，紐油一度失守每桶88美元，跌至半年低位，紐油已經超過10個交易日處於200天線之下，依家美股炒經濟軟著陸，但油價就睇經濟衰退，短期係咪難有起色？
信誠證券及期貨投資服務部董事蕭猷華認為，油價短期的確唔樂觀，內地剛出爐嘅經濟數據都比較弱，美國GDP就連續兩季收縮，經濟陷入技術性衰退，但內地減息，美國就繼續加息。
佢又話，如果睇需求層面，中美作為全球兩大最大經濟體系，現階段經濟增長放緩，似乎未見到最壞情況，估計油價有機會跌至80美元水平，若有機會上返90美元水平就要沽出。
