【Now財經台】內地今朝出咗「三頭馬車」數據，即零售銷售、工業增加值及固定資產投資，全部都差過預期，而人行今朝亦宣布，縮減中期借貸便利(MLF)規模，同埋下調1年期MLF利率0.1厘至2.75厘。「三頭馬車」數據公布後，港股一度失守20000關。
中信銀行(國際)首席經濟師卓亮指，7月數據同市場預期有明顯落差，增長動力冇明顯改善，尤其零售銷售數據持續疲弱，喺疫情下，過往即使經濟出現復甦跡象，零售銷售、私人消費表現都相對滯後，反映國內整體經濟活動所受嘅壓力唔細，不過，見到近幾個月內地出口數據顯著反彈，貿易順差又創新高，因此，出口未來或成為內地經濟其中一個亮點。
