【Now財經台】華虹半導體(01347)中午出咗季績,股價中午前已偷步升咗上去,一度升逾8%,放榜後就少一截,係咪市場唔收貨?雖然華虹收入再創新高,按年增長亦持續強勁,但純利按季出現倒退,係咪增長開始放緩嘅「警號」?
艾德證券期貨聯席董事陳政深指,華虹股價今日只係反映低買高賣嘅行為,升到高位自然會有投資者獲利,股價短至中線仍維持向下趨勢,只係間中有催化劑令股價升返上去。
Ryan又話,睇返呢份業績,市場對華虹第3季展望都唔會太樂觀,第2季毛利率升主要受惠於半導體價格上升,但睇返第3季業務指引,毛利率會維持喺現水平,冇進一步大幅上升空間,雖然華虹對業務前景未至於睇得太悲觀,但都傾向審慎。