【Now財經台】龍湖集團(00960)錄得2009年上市以嚟最大單日跌幅,股價今朝平開後,跌勢持續,午後跌勢顯著加劇,一度急瀉逾19%,低見20.1元,收市跌勢喘定,報20.9元,大跌逾16%,係跌幅最大藍籌。
龍湖股價急瀉,內媒喺港股收市前引述知情人士指,集團發行嘅商業票據逾期傳聞純屬謠言,大華繼顯分析員亦即時回應,指龍湖發行嘅商業票據規模唔夠10億人仔,遠少過中國恒大(03333)嘅2000億人仔,龍湖股價今日急挫可能受瑞銀下調評級及狠劈目標價影響。
龍湖股價今日喺大成交下跌至逾3年低位,並插穿保歷加通道底部,後市要睇實公司會唔會出澄清通告穩住股價。