【Now財經台】國泰航空(00293)中午派咗成績表，上半年虧損收窄逾30%，收入按年增長17%，唔派中期息。集團指，政府5月起調整旅遊限制及檢疫要求，上半年後期已實現經營正現金流。國泰股價午後升幅曾擴大至逾3%，但好快已收窄至約1%，其實國泰呢份業績唔算差，但睇股價反應，市場似乎唔係好收貨。
英皇證券研究部總監陳錦興指，國泰呢份業績符合預期，但撞正大市氣氛比較差，港股跌幅不斷擴大，令買盤再推上去時都會有戒心，而8.8元呢個阻力位亦唔容易突破，由於買盤唔敢太進取，股價衝咗一下升幅就收窄返。
國泰上半年燃油對沖收益大增逾2倍，陳錦興認為，依家市場就燃油對沖對國泰嘅影響，已經冇以前咁敏感，喺油價高企下，對沖係可以拉低成本，至於國泰下半年經營情況，佢認為唔需要太擔心，原因係...
