【Now財經台】煤股今日繼續破頂，其中兗礦能源(01171)上試6月高位，俄羅斯煤炭最新被禁進口，按計劃歐盟將於8月10日正式禁止俄羅斯煤炭進口。有分析預期，禁令或令海外煤價持續高企。禁令快將生效，係咪解釋到煤股近日嘅強勢？
獨立股評人莫灝楠指，自俄烏戰事開打後，俄羅斯本身供應去歐洲嘅產能，轉移去印度、中國、土耳其等，整體供應量唔單止冇減少，反而有所增加，加上美國處於加息周期，GDP開始下跌，但通脹仍然高企，估計去到衰退周期，能源使用量就會下跌。佢又話，煤炭股股價處於歷史高位，但煤價及能源價格未必可以喺高位撐到好耐，唔建議投資者喺高位追入煤股。
