【Now財經台】截至早上11時止，1小時內《彭博》用戶關注度上升最多港股，依次為新鴻基地產(00016)、新世界發展(00017)、小米集團(01810)、長實集團(01113)、恒基地產(00012)。
《彭博》引述行政會議召集人葉劉淑儀指，本港考慮免除內地買家雙倍印花稅，呢個構思選擇性畀優惠某類人士，社會對政策向內地人士傾斜，會唔會產生較大阻力？點解唔直接「減辣」谷返起低迷嘅住宅市場？
大華繼顯執行董事梁偉源指，其實近年嚟香港買樓嘅內地投資者唔多，就算取消雙倍印花稅，市場供應都唔會有太大改善，反而有新資金嚟香港買樓會推高樓價，同政府要遏樓價嘅目標背道而馳。
Steven又認為，依家內地人喺內地買樓嘅意慾唔大，但其實佢哋手頭上都有一定資金，如果喺香港買樓唔使畀雙倍印花稅，入市意慾係幾大，因此，如果政府希望多啲資金入市，令香港樓市活躍返，相信呢個政策係會有成效。
