【Now財經台】有「小領展」之稱嘅置富產業信託(00778)，今日逆市造好，股價衝上兩個月高位，一度高見6.98元，升逾5.7%，公司噚晚公布上市後首單海外收購，斥資約5億港元，收購新加坡高文之星物業(Stars of Kovan Property)，雖然交易作價唔高，但係集團首度進軍海外，係咪會成為股價短期嘅催化劑？
元宇證券投資總監林嘉麒指，要睇下公司係咪想喺姊妹公司買資產，或有計劃進軍海外，所以要先知道公司嘅藍圖，今次置富呢單收購，反映公司冇明顯增長點，置富業務以香港及民生相關為主，呢啲業務嘅投資價值唔算吸引，如果集團進軍海外，甚至憧憬公司將多啲項目放落去，令收益多元化，或令收益率更加靚，更能吸引投資者。
KK又話，置富依家槓桿比率較低，其實可以做多啲併購，未來要留意公司再有咩搞作。
