【Now財經台】紐約期油及倫敦布蘭特期油上周急挫，踏入新一個星期暫時喺低位喘定，前者企喺每桶90美元以下，後者就喺95美元水平，美國上月非農新增職位數據強勁，加上內地上月原油進口亦自4年低位反彈，經濟形勢似乎唔算太差，油價今個星期有冇動力自低位反彈？
Z.Com Bullion亞太區業務總監杜浩霆估計，油價短線應該會輕微反彈，但基本面及技術面都幾弱，尤其紐油上周失守90美元，長線嚟講要留意兩個因素，首先係OPEC+增產情況，其次係俄烏戰事，暫時整體油市都係偏淡，佢又預期，油價中長線有機會跌穿87美元，一旦失守，有可能落返戰前水平，即65美元水平，甚至更低。
