【Now財經台】經營Sogo崇光百貨嘅利福國際(01212)，獲大股東劉鑾鴻(細劉)提出以每股5元私有化，較停牌前有逾62%溢價，受疫情影響，集團去年收入只及2018年約一半，而疫情亦改變咗零售格局及消費模式，Sogo客源主要係內地客及本地客，但本港暫時仲未可以同內地通關，利福業務復甦係咪好困難？
《香港股票財技密碼》作者梁杰文話，受疫情影響，內地旅客大減，但投資市場係向前看，如果樂觀去睇，依家會唔會係最壞時期？嚟緊各地可能會慢慢放寬入境限制，而內地疫情或開始緩和，到時就會有多啲旅客返嚟香港，其實唔少國家已放寬咗旅遊限制，當地嘅旅遊業都好火熱，雖然仲未重返疫情前，但起碼已喺低位大幅反彈。
Mike又話，唔需要太執著利福嘅生意額少咗，至少喺咁惡劣環境下，仲keep到一半生意額，只要未來放寬旅遊限制，生意額好大機會見底回升。
