【now.com財經】今朝揀咗隻恒指牛(63768)出嚟，同以往一樣分咗兩個入市策略，不過，去到上半場完結前，進取嘅以五分鐘圖指數踩得住50分鐘線(五分鐘圖10線)或保歷加通道中軸而出動，呢招行唔通，因為見指數每到SMA之後就二話不說地向下運行；直至到臨收市前10分鐘，本以為安全策略嘅以Slow STC(14,3)Swing Trade有望出到貨，但最後都係爭條%D線未踩過入超賣水平，(63768)可以掉埋一二邊。
中午收市時有條新聞話「央視報道解放軍中午12時環繞台灣展開重要軍事演訓及組織實彈射擊」，望住條台灣加權指數，由今朝9點幾慢慢向下落到11點左右，跌勢開始加速，去到今朝大約11點45分，指數落到暫時低位14,547點後回升，至12點37分左右見指數報14,660點(台灣股市開市時間由朝早9點至下晝點半)，唔通...個演訓...係流嘅...
點會流呢，傻嘅，微博一Po晒出嚟，依家1點6分，午間新聞又有片有訪問咁報緊呢單嘢，兩邊都有Show off，唔通啲片係假/錄播/資金片段咩，無可能嘅；再者，恒指喺下半場開市之後有緩緩再向下跌，Slow STC(14,3)喺下半場開市後首五分鐘%K線已經再次失守%D線，雖然係可以拎返隻(63768)出嚟Standby，不過，五分鐘圖上見目前整條保歷加通道向下運行中，指數其實都只係得今朝早開市首15分鐘有啲動力之外，其他嘅都同條死魚無乜分別。
依家1點18分，五分鐘圖見指數慢慢地落到250分鐘線(五分鐘圖50線)附近，Slow SCT(14,3)兩線終於都齊齊進入超賣範圍，(63768)拎返出嚟嘅話唔係問題，問題在於踩得住呢條250分鐘線之後，又可唔可以上得到條50分鐘線之上呢？比多少少時間，隨便睇埋條保歷加通道同Slow STC(14,3)走勢。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
