【Now財經台】餐飲股7月一直喺低位橫行，但同樣係飲飲食食嘅食品股，就跌足成個月，當中包括周黑鴨(01458)，公司最新發咗盈警，估計中期最多少賺96%，主要受疫情反覆影響，加上原材料價格上升，仲有匯兌損失，其實周黑鴨今朝一度升2%，但之後轉跌，係咪市場睇到一啲細節？
英皇證券研究部總監陳錦興指，可能市場對呢類股份都比較謹慎，周黑鴨6月曾經有一浸升到5.5元水平，去到7月出現較明顯嘅沽壓，而集團曾經同分析員傾過經營情況，之後大行就降盈利預測等，對公司出現虧損都有準備，雖然盈警顯示唔使蝕錢，但盈利都冇咗一大截，加上毛利率會跌幾多，市場都係有疑慮。
佢又話，周黑鴨一直係撳住嚟沽，暫時冇乜反彈動力，相信要等業績出爐，從管理層方面攞到更多訊息，市場才會重新部署周黑鴨。
