【Now財經台】截至早上11時止,1小時內《彭博》用戶關注度上升最多港股,依次為信義光能(00968)、快手(01024)、美團(03690)、領展房產基金(00823)、小米集團(01810)。
信光係今朝升幅最大藍籌,中午收市升近6%,今日成板清潔能源股炒上,係咪同噚日召開嘅中央政治局會議有關?會議提及,要全方位守住安全底線,強化糧食安全保障,提升能源資源供應保障能力,加大力度規劃建設新能源供給消納體系。
大華繼顯執行董事梁偉源指,政治局講新能源發展已經唔係新鮮事,佢都唔明點解信光呢類股份咁大反應,睇返成個新能源板塊,光伏玻璃股固然好,但其實最好應該係多晶硅,因多晶硅價格6月至今已累升逾10%,加上呢啲公司可以上調產品價格,不過,呢類股份就唔識升,反而信光呢類光伏股就冇加價能力,加上下半年光伏玻璃供應增加,甚至出現供過於求嘅情況,所以對光伏股嘅升勢令人費解。
Steven又話,嚟近要特別留意信光上半年業績,同埋集團對下半年嘅展望。