【Now財經台】截至早上11時止，1小時內《彭博》用戶關注度上升最多港股，依次為小米集團(01810)、合景泰富集團(01813)、華能國際電力股份(00902)、碧桂園(02007)、華潤置地(01109)。
手機相關股小米今日佔據榜首，蘋果公司會喺今晚美股收市後出季度業績，預期上季收入按年僅增長逾1%，經調整純利更要倒退12%，主要受內地封控措施、強美元打擊收入，加上業務增長引擎「服務收入」增速放慢，小米喺Apple今晚出季績前造好，市傳Apple產品喺內地減價，對小米有咩影響？
椽盛資本投資總監曾永堅指，今日手機概念股有啲起色，主要喺上海嘅手機部件前期供應喺6月逐步解封，供應慢慢恢復常態，雖然出貨、生產大幅增長，但其實主要係之前積壓嘅定單，小米股價今日升得比較靚，有新產品上架係一個利好消息，但睇返一啲市場比較權威嘅預測，下半年手機市場新型號、新產品，具突破性功能嘅產品，未必睇得太樂觀，尤其喺歐美經濟係咪已經開始衰退，因此，小米股價可能只係受有新產品上架帶動而短線造好，睇返技術走勢，估計短期喺100天線，即13.4元、13.5元會有阻力。
