【Now財經台】截至早上11時止，1小時內《彭博》用戶關注度上升最多港股，依次為碧桂園(02007)、碧桂園服務(06098)、龍光集團(03380)、中國海外發展(00688)、新世界發展(00017)。
市傳碧桂園趁股價反彈配股集資約28億元，但其實股價仍處於低位，而今次集資所得只夠派末期息，截至去年底止，碧桂園總借貸3179億人仔，1年內要還嘅銀行借貸642億人仔，集團手頭現金就有1813億人仔，相對於整體債務真係杯水車薪。碧桂園股價畀配股消息震散，同系碧服今朝一度急挫逾22%，跌幅仲大過碧桂園，市場係咪擔心碧服繼去年11月之後再「抽水」？
富昌證券聯席董事譚朗蔚指，之前已提醒投資者，即使碧桂園反彈都唔好亂溝貨，始終好難相信公司嘅信貸問題可以喺短期內解決到，不過，今日明顯係碧桂園配股拖累碧服，當公司願意喺低位配股，市場會擔心集團係咪真係咁缺錢，碧桂園今次急急配股，或反映管理層覺得冇可能等到價位好高先配股，集團嘅情況有幾嚴峻可想而知。
Stevan又指，即使碧桂園股價有得彈，但內房、物管板塊仍要避開。
