【Now財經台】愈嚟愈多股份選擇喺香港及紐約雙重主要上市，阿里巴巴(09988)最新宣布已向港交所(00388)提交申請，將新增香港為雙重主要上市地，不過，睇返同樣係雙重主要上市嘅股份，例如理想汽車(02015)及小鵬汽車(09868)等，似乎對股價冇乜幫助，但點解呢啲公司會選擇雙重主要上市？
潤淼資產管理董事盧志威指，雙重主要上市唔關股價事，純粹係公司想減低喺美國嘅敏感資料數據及體積，一旦有咩問題，公司可以即時將業務搬返嚟香港，美國方面係唔使完全停牌，佢認為雙重主要上市嘅意義就係在於有Plan B，即係一個後備方案，相信對成交量及買賣唔會有太大幫助。
