【Now財經台】青島啤酒(00168)上周公布，會喺韓國推出青島啤酒沙灘球套餐，加上憧憬夏天係銷售旺季，以及青啤係幾隻啤酒股中市盈率(PE)最低，呢啲消息似乎都係青啤今日逆市炒上嘅幕後推手。
獨立股評人譚智樂指，青島啤、華潤啤酒(00291)及百威亞太(01876)，3家公司未來1年嘅估值的確有分別，當中以青啤估值最平，而盈利增長較慢嘅百威就最貴，不過，如果以近1年銷售數據去睇3年後嘅預測PE，其實都差唔多，因此，相信唔會有資金集中瞓身某1隻啤酒股，而3家公司都係走高端化路線，只係睇邊個率先跑出，潤啤及青啤股價過去半年跌得較多，短線反彈動力唔錯，但始終即將要面對業績，尤其毛利率見頂回落風險好大，短線要小心走勢逆轉。
