【Now財經台】截至早上11時止，《彭博》用戶關注度上升最多港股，依次為龍湖集團(00960)、龍源電力(00916)、郵儲銀行(01658)、萬科企業(02202)及建設銀行(00939)。
內房繼續成為大市焦點，港股就持續弱勢，其中一個原因係，內地爛尾樓斷供潮持續發酵，繼而衝擊大市。龍湖及萬科今日都要跌，龍湖係民營內房，比起有深圳國資背景嘅萬科跌得多，係咪反映有「後台」嘅內房股會硬淨啲？
椽盛資本投資總監曾永堅指，一旦爛尾樓斷供潮愈演愈烈，甚至去到一發不可收拾嘅地步，尤其會對民企造成惡性循環，因為潛在買家擔心事件拖累呢啲公司嘅財務狀況，因而唔敢買民企發展商嘅樓，亦令買家覺得有國資背景嘅發展商安全啲，呢啲憂慮正正反映喺股價。
