【Now財經台】截至早上11時止，1小時內《彭博》用戶關注度上升最多港股，依次為中國恒大(03333)、金沙中國(01928)、銀河娛樂(00027)、海底撈(06862)、合景泰富集團(01813)。
滙豐證券最新預期，大部分內房發展商將進入「迷失十年」，銷售將連續第3年下跌，並估計至2030年，內房整體規模將萎縮26%，重返2017年水平，如果照滙證咁講，內房應該仲有排捱，係咪都唔好掂民營內房股？
富昌證券聯席董事譚朗蔚指，民企嘅資金鏈一定比較艱難，例如疫情會阻礙買家買樓，即使疫情過後，都要慢慢觀察啲數據，先再決定點做。雖然中國海外發展(00688)、華潤置地(01109)係相對安全，但唔代表股價一定會升，始終要睇好多基本因素，例如數據、銷售等。
佢又話，至於內房係咪會進入「迷失十年」，佢認為冇一個特定年期，總之會經歷一段好長時間嘅整固，出現一個「大食細」嘅局面，短期都唔睇好呢個行業。
