【now.com財經】明知指數向住牛證街貨方向殺，所以今朝早喺作戰室一早響晒話出淡倉，由未開市講到完上半場前，前前後後有唔少戰友來來回回啲淡倉都唔知食咗幾多次/格，不論是新加入還是對住我啲策略都見慣見熟嘅，大家都有進賬。
今朝揀咗隻恒指熊(57435)出嚟，進取嘅吼指數喺五分鐘圖上破唔到50分鐘線(五分鐘圖10線)而出手，以今朝Patreon出文時間為10點23分，其實當時指數喺五分鐘圖上已經無力向上突破50分鐘線，指數愈推愈落。On top加多10分鐘作為刨文時間，即10點33分(好計數用10點半)指數已經見到一支比較大大地嘅陰燭受制於50分鐘線下而出現，指數向下再落，進取搶貨的確可以喺呢個位出動隻(57435)，以今朝10點30分至10點40分，(57435)高低位做過0.081元/0.073元計，平均買入價為0.077元。
落場後指數亦不負所託地向下再落，喺 11點見上半場低位21480點，雖然(57435)出動嘅時間比喺作戰室嘅淡倉遲，但由於(57435)槓桿搭夠，所以(57435)都見到證價上到0.089元嘅高位，不過又有幾多個可以偷到咁準呀！喺11點20分打後見到指數開始進入橫行狀況，受到保歷加通道收窄影響，即使指數橫行但都會被收窄中嘅通道而被迫上破保歷加通道中軸，臨完上半場前就係有咁嘅情況。但喺11點20分時已經見到指數被上破返條50分鐘線，本身以不破50分鐘線而出嘅淡倉，依家條線被破壞咗，理論上(57435)都要收隊。以11點20分至11點30分(10分鐘走貨時間)計，(57435)期內高低位做過0.087元/0.085元，平均走貨價為0.086元，一計之下呢趟爬格快手平均執九格11.69%，都夠Happy Lunch啦。
指數跌，藍籌股基本上又難免幸，又再繼續跟進手上嘅中移(00941)牛(54741)，之前Set咗嘅止蝕位喺大約48.7至48.8元呢個橫行支持區。就正正喺今朝指數向下插，做出上半場新低嘅時侯，中移股價跌至48.6元，失橫行支持區，觸及咗(54741)止蝕嘅訊號，以10點40分失守嗰下起計10分鐘走貨，(54741)高低位做過0.029元/0.028元，平均走貨價為0.0285元，平均輸9.52%。好彩有隻(57435)今朝頂一頂，拉上補下扣埋手續費，當去完異世界返嚟咁。
依家1點31分，喺五分鐘圖上見到下半場開市後指數於保歷加通道行出爭兩點「平頂」出嚟，淡倉當然可以再開，到依家更見保歷加通道口再次拓闊，雖然21,400至21,499點為重貨區，但我都幾相信呢堆貨走嘅速度拍得住港人移民嘅速度...
當21,400至21,499點嘅街貨全數嘅收回嘅話，指數再壓落去會見邊一層？
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
想入作戰室？Click呢度就得：https://www.patreon.com/cbbcwar
