【now.com財經】恒指高開低走到一度出現倒跌情況,今朝個大型開市裂口已經玩完,指數喺五分鐘圖上見高開低走後,隨住保歷加通道收窄,11點打後開始等放飯咁款。
睇返恒指日線圖,其實噚日指數落到20天線之後博佢有支持再向上走返都真係合理不過,又同時見保歷加通道口今日都有拓闊嘅情況,只係今日上半場走勢比較肉酸,暫時出現實心陽燭,即係高開低走嘅升。假設指數要再上,喺日線圖上要行出「小V」走勢,當然需要藍籌幫手向上推高多一把啦,但以指數做Trade嘅,都Alert一下條150天線。
準備下半場開市之前,出面個天黑到要瞳孔絕對放大先搞得點,不過恒指反而光亮咗,下半場開市後見指數有一下再向上由高,但可惜嘅係目前保歷加通道仍然收窄中,除非帶咗貨過Lunch先至可以有動作,無貨嘅都應該等保歷加通道口再拓闊先至出手。等待,其實都係一種策略嚟架。
至於手上嘅中移(00941)牛(54741),正如前文所指,如果指數要喺日線圖上再挑戰150天線的話,問藍籌股借力係唔少得,再加上本身中移日線圖都見低殘,所以先至膽粗粗出注牛證嚟博一博。今朝Set嘅止蝕位,即48.7至48.8元呢個橫行支持區,至今暫時都未有失守,(54741)加油。
作者阿珊,任財經/投資版傳媒人十幾年,《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證,唔貪心,志在搵餐下午茶。
想入作戰室?Click呢度就得:https://www.patreon.com/cbbcwar