【Now財經台】近期內地航空股表現強勢，主要反映市場憧憬內地將逐步放寬防疫限制，旅遊業有望復甦。內地3大航空公司齊齊宣布，斥巨資採購新客機，合計訂單規模接近300架，涉及金額約2600億港元。不過，3大航空股今日齊齊回調，而且明顯「跑輸大市」，今日航空股下跌嘅主因係咩？只係近期升勢過急？
紅蟻資本投資經理李澤銘指，近期升勢過急都係一個原因，投資者認清短期內未必可以實現對內地航空業嘅憧憬。之前升得急嘅原因係內地放寬咗入境隔離限制，大家憧憬內地航空業整體會出現客運量復甦。雖然見到內地防疫隔離政策有所放寬，但相比其他國家出入境旅遊暫時都唔需要隔離政策，要令內地出行數量復甦或者同國際之間恢復交流仍然都仲有一段距離，所以短期大家都知無法兌現呢個憧憬。佢又提醒，航空股升咗一輪，對短線投資者嚟講，可以選擇先行獲利。
