【Now財經台】國家衛健委宣布內地入境隔離時間，由「14+7」調整至「7+3」，消息一出，旅遊及航空相關股應聲抽升，其中以攜程集團(09961)升勢最凌厲，一度急升逾25%，其後升幅收窄，但仍keep到逾10%升幅，其實集團上季仲係蝕錢，睇返分部收入，只得交通票務有增長，其他如住宿、旅遊度假、商旅管理都要倒退，今日大升係咪純粹炒作內地縮短入境隔離時間？
獨立股評人莫灝楠指，睇返以往酒店及旅遊相關股嘅股價走勢，炒作模式都係疫情嚴重時跌到低位，防疫政策稍微放寬時就升返上去，未來會唔會開關，甚至未來會唔會有新變種病毒，全部都係未知數，所以好難估計攜程未來嘅股價表現，加上即使交通票務收入有增長，都好難彌補到住宿業務、旅遊渡假嘅收入空隙，投資者必須注意風險。
