【now.com財經】咪話我哋作戰室成班日除咗對住個市圍爐之外，其他嘢就各自為政，除咗平時吹水、噓寒問暖、上至Ivy So、下至蘇雅林之外，真心有好嘢大家會喺大廳度開心Share，今日其中一位戰友表示，女友工作嗰幢大廈有商家放棄咗16板貓砂，係16板，唔係16包。據報悉一板有64箱，一箱有4包，每包5至6L，(三一得個三...五一得個五...)保守估計有超過4,000包貓砂喺度等人「領養」，當愛協都因為「土地問題」而鯨吞唔晒之下，大家都努力四出搵其他貓舍、貓義工、朋友等幫手吞，如果你本身有需要/有相熟嘅貓舍係有需要，嘗試搵我(幫你再搭過去)。僅代表所有貓貓多謝Patrick同Patrick女友，霸氣一句：一盒都唔會掉！我寧願自己貼錢搵貨車送去救貓組織度！好人一生平安。
今日恒指低開後，指數一直向下行，上半場低位落到去21,952點之後見停，雖然之後指數有少少向上爬高幾格，但係離上半場完場前半個鐘(至少)，指數已經咬住條中軸橫行，情況同我家肥貓一樣，都係打橫一字形。
今朝有揀過一牛一熊出嚟，用30分鐘圖嘅保歷加通道中軸作為分界線，踩得穩嘅就出好倉；相反就出淡倉。睇返個30分鐘圖，指數係處於保歷加通道中軸以下水平，但留意唔係指數向下穿過條保歷加通道中軸，而係保歷加通道中軸向上升穿條指數，恒指根本就無郁過。
下半場開市之後，恒指都真係不負所托，指數稍稍再爬高多兩格，上返去保歷加通道中軸以上，但保歷加通道口有開始收窄嘅情況，更係啦，悶咗咁耐，唔窄就假啦。咁橫行嘅走勢都真係落唔到啲咩DT注。
至於隻回歸Call(29349)，小時圖中軸一日不死，一日照Hold，比啲爭扎。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
想入作戰室？Click呢度就得：https://www.patreon.com/cbbcwar
