【Now財經台】前稱GOGOVAN嘅快狗打車(02246)(GOGOX)上星期五首掛，最終「潛水」逾22%，今日上市第2日仲未喘定，一度再插逾10%，連15元都守唔住，到底GOGOX「死因」係乜？
《香港股票財技密碼》作者梁杰文指，GOGOX股價「深潛」，反映有揸重貨嘅投資者急不及待要沽貨離場，一般散戶可能唔明白點解GOGOX跌到咁，以今日即市低位計，已較招股價21.5元，「潛水」逾30%，仍有投資者心急套現，其實GOGOX本身定價偏貴，投資者參考投資成本後，即使喺15元水平沽貨離場仍有錢賺。
Mike認為，今次畀咗投資者一個「教訓」，就係以後抽新股，必須留意上市現有股東嘅持股有冇設禁售期，如果好似GOGOX咁冇設禁售期，股份一上市，主要投資者就好易「閃人」，拖累股價大幅下滑。
