【now.com財經】今朝揀咗恒指Call(29349)出嚟，揀得Call都真係預咗要準備過夜，隨時係過幾晚夜都唔出奇 ，所以都有兩種入市策略，進取嘅可以吼五分鐘圖見指數於保歷加通道中軸有支持時進場；安全嘅，一如以往，等Slow STC(14,3)落返去超賣水平時先至出Call。
喺今日上半場嘅時候，指數真係愈升愈有，所以作戰室裡面都有戰友啲即市、過夜，甚至回歸Call都率先食餬，慢升之下逐百點逐百點咁向上打返上去，指數喺11點30分時一度失守過50分鐘線(五分鐘圖10線)，但100分鐘線(五分鐘圖20線)就掂都未掂到就再向上彈高過。最終今日上半場指數升684點，報22,403點，指數總共殺咗七層熊證街貨，呢度夾埋有相當於2,859張期指。今日星期一，仲過要多兩日先至星期三(29日)，即期指+半年結，咁快殺咗咁多貨，未到結算日就已經砌到條數咁靚，提早慶祝咁話喎。
下半場返嚟之後，恒指忽然升幅收窄，喺五分鐘圖上終於見到Slow STC(14,3)向下落到超賣水平，喺大約1點20分至1點25分，Slow STC(14,3)仲落到去個位數嘅嚴重超賣範圍，同時喺呢個時侯都見到五分鐘圖上250分鐘線(五分鐘圖50線)作勢有支持，吼呢個位摺隻(29349)的話可以，按期內(29349)高低位做過0.134元/0.13元計，平均買入價為0.132元。
到依家1點49分，喺五分鐘圖上見到指數於250分鐘線有止步嘅走勢，但基於目前保歷加通道橫行，指數波幅開始減低，暫時於中軸至底線作Swing Trade運行。
又咁講，(29349)本身出嚟真係做回歸Call，日線圖上目前見指數係未能上破150天線，仲出咗條上影線出嚟，還好燭身暫時都仲係肥，晏少少如果減肥成功就麻煩啦，因為有可能於高位行出「射擊之星」，之後仲要向下反轉頭穿100天線的話，咁隻回歸Call先至塵歸塵、土歸土。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
想入作戰室？Click呢度就得：https://www.patreon.com/cbbcwar
