【Now財經台】中央力谷車市，除咗傳統車股，個別相關股份都借勢炒上，其中京東方精電(00710)今朝平開後，升幅不斷擴大，最多升逾13%，高見14元，最終以接近全日高位收市，報13.8元，升逾12%，成交股數較過去100日同時段平均增4倍。
京東方精電股價3月因內地汽車供應鏈受阻，一度跌穿6元，仲失守所有移動平均線，但隨著上海復工復產，股價今個月重拾動力，今日已連升第4日，仲突破對上兩個阻力，今個月暫時累升46%，係上市以來第3大單月升幅，仲創埋易主後新高14元，但要留意14天RSI已升到83嘅嚴重超買水平，要小心有回調風險。
