【Now財經台】美國上周通過《海運改革法案》嘅2022修訂版，大和認為，法案對壓低運費嘅作用唔大，因美國官方始終冇權介入制訂運費，加上環球經濟有下行壓力，令航運需求減弱，經濟因素係咪航運股嘅「死因」？
大唐資本投資策略部總監盧志明指，經濟因素絕對關鍵，航運股喺過去兩年，係一個相對複雜嘅板塊，如果純粹以經濟周期作依歸，運費唔會咁高，航運業呢兩年咁好景係疫情帶挈。
Ken又話，除咗經濟因素，亦要留意疫情緩和後，唔再有封控措施，空運及陸路運輸情況改善，航運費用未必好似之前咁高。佢又話，航運股近日好似跌咗好多，但其實早於兩三個星期前，較強勢嘅太平洋航運(02343)等已陸續失守50天線，尤其行美國航線嘅航運股，所以航運股跌唔係呢兩日嘅事。
