【Now財經台】截至早上11時止，1小時內《彭博》用戶關注度上升最多港股，依次為中電控股(00002)、京東健康(06618)、金沙中國(01928)、吉利汽車(00175)、小米集團(01810)。
噚日醫療平台股升得唔錯，阿里健康(00241)更係升幅最大藍籌，但今日打回原形，睇返消息面，藥監局計劃禁止第三方平台直接參與藥品網售，雖然之前已講過只係徵求意見稿，而徵求意見已經截止，但市場似乎都係對呢類監管消息較敏感，醫療平台股今朝被震散。
獨立股評人譚智樂指，3隻醫療平台股股價走勢大同小異，因投資者都知道有監管因素，但隨著近期平台股有放寬跡象、手遊版號獲批發、電商平台營運數據有改善等，令市場憧憬所有監管因素有機會逐步消退，但問題在於當股價受惠於呢啲利好因素時，發現原來只係市場「一廂情願」，市場睇得太好時，獲利回套沽壓可以好大，所以醫療平台股短線唔可以盲目樂觀，或認定監管一定會放寬。
Arnold補充，投資者可以將京東健康10天線作為「落車位」，再跌穿就要考慮走人。
