【now.com財經】上周五(6月20日)黃昏出了一件大事，有人認為有可能令到香港會被制裁，歐美國家唔准國人投資香港股市，這件大事就是俄羅斯政府宣布，從6月20日開始，聖彼得堡股票交易所可以買賣12隻港股，如果不是擔心被歐美國家制裁，這當然是一件好事，更加可以令到香港體驗成為世界金融中心感受，但如果被制裁，甚至被踢出SWIFT ，就邊度都唔使去，好彩港交所(00388)的反應都算快，立刻否認有關合作，表示這應該是俄羅斯自己推出的投資計劃，既然冇合作，歐美國家亦應該沒有藉口制裁港交所。
有江湖朋友話，金融業人士太過正直，其實唔知有乜好擔心，俄羅斯政府開外圍檔賭港股，當然不用知會港交所，現在只不過向全世界公布，如果想玩港股，不一定要經港交所，可以經聖彼得堡股票交易所，今次只是有12隻港股，遲下有200隻，再遲下有1,000隻，甚至全世界的的股票都可以在聖彼得堡買賣，令到聖彼得堡成為地下金融中心。
所以，如果歐美國家制裁香港，他日當他們的股票可以在聖彼得堡買賣，豈不是要制裁自己，咁蠢的事，歐美國家的領袖是唔會做，江湖朋友叫我放心，並且將他的意見對金融界朋友講。我話有難度，我點可以話俄羅斯開外圍檔，太有江湖味道，時代進步，應該用一個比較進步的名字。
有靈界朋友話，落觀陰大家唔識，但元宇宙大家就似乎非常了解，其實兩者是差不多，都是玩魂遊太空，兩者用的道具是一樣，都是要戴一個眼罩，所以，聖彼得堡開的不是外圍檔，而是現實世界的元宇 宙，股票是假的，聖彼得堡並沒有真的香港股票，但買賣交易是真的，投資者贏咗有錢收，輪咗要找數，今次真係時代進步，元宇宙可以在現實世界落地生根。
