【Now財經台】內房板塊今日受惠於「房票」救市，午後愈升愈有，一度係今日升幅最大藍籌嘅碧桂園服務(06098)，今朝高開2%後，愈升愈有，好快就衝破30元整數關口，下晝升幅繼續擴大，一度升逾15%，高見32.25元，成交金額逼近9億元。
碧服今日一舉升穿10天、20天、50天線及保歷加通道頂，亦突破由3月中拉出嘅對稱三角形上方阻力線，但值得留意係，雖然碧服今日突破上方阻力線，但成交唔係特別多，截至下午2時15分，成交股數較過去100日同時段平均僅增約1倍，唔算好配合升勢。
至於MACD快線喺熊區已升穿慢線，股價或可以回穩，留意短期可唔可以企穩對稱三角形之上，量度升幅上望52元，否則可能只係「假突破」，雖然碧服今日爆升，但今年暫時仍累跌逾30%，若想跟進都要睇定喺先。
