【now.com財經】朝早喺作戰室都只係做咗先淡後好兩注，但以日線圖，見指數於20天線同50天線之間做緊三文治，真係難處理，所以一係做嘢，唔睇市；一係就好似我咁，望住我家肥貓瞓覺好過。
Lunchtime前舊同事傳來一則喜訊，就係Designer Danny年底結婚，問大家去飲定觀禮，雖然以目前疫情嘅情況都好難估計得到年底會發生咩事，可以成功清零，全面放寬；又或者年底冬天再嚟多Round高峰期，宴會又收緊到得返廿個人。不過，「屋企有個袁國勇」嘅另一個同事表示，應該都係只去觀禮多，因為「袁國勇」會擔心，笑死我。
下半場開市後，都係見到指數唔上唔落，喺五分鐘圖上見到保歷加通道口收窄中，限制住指數活動空間，情況同日線圖真係好相似。
再等到依家1點13分，指數升轉跌見向下落到保歷加通道底線，的確，咁窄嘅空間好難去出啲可以坐得耐少少，或者根本都未見到有條件喺五分鐘圖上出現單邊走勢嘅情況。唯有轉個小時圖出嚟，就見到喺上一個鐘，即11點至12點期間，喺保歷加通道中軸水平行出「十字星」形態，雖然都真係唔算係一個高位，而指數於1點至2點依家運行中嘅小時圖燭上係有下行嘅走勢，蓋而保歷加通道又整條橫行中，要博指數再向下行落去保歷加通道底線係正常Swing Trade做法，但今日實在太多天線喺度。
依家1點25分，指數都遲遲未見單方向，小時圖再拆再睇見有10小時線(小時圖10線)喺下方兜住指數，唔怪得之上又上唔到，落又落唔到啦。
連小時圖都出埋蛋牛治，今日都係觀戰/觀貓算啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
想入作戰室？Click呢度就得：https://www.patreon.com/cbbcwar
