【Now財經台】上市差不多半年嘅微博(09898),今年第1季由盈轉虧,收入就按季跌20%,收入亦係過去4個季度最少,微博賺變蝕主要受投資減值、投資公允價值變動等因素拖累,呢份季績係咪真係好差?
艾德證券期貨聯席董事陳政深指,若按年比較呢份成績表就唔算太差,至少廣告營銷收入都穩步上升,不過,按季比較就認真麻麻,因為去年第4季及今年第1季,市場情況未至於太惡劣,但廣告及營銷收入由逾5億美元跌到4.2億美元,跌幅都幾顯著,一般來講,好多公司年初嘅廣告推廣預算係多啲,但微博都受惠唔到,呢方面的確麻麻地。
Ryan又話,微博行政開支、產品開發開支不跌反升,反映成本控制交唔到功課,拖低經營利潤,所以呢份業績係唔理想。